政壇：搞搞政：鄧國威辣慶議員「被針灸」

立法會公務員及資助機構員工事務委員會尋日開會，討論將中醫服務納入公務員醫療福利體制，出席嘅公務員事務局局長鄧國威解釋，依家中醫診所唔係隸屬衞生署，兼以自負盈虧方式營運，未被納入政府常規服務之列。佢更多口形容中醫係「非正統」服務，所以無緣同政府西醫及牙科服務「平起平坐」，報銷中醫診費免問。

呢番開場白，即時辣慶工聯會三名議員，鄧家彪先批評政府帶頭漠視市民對中醫嘅需求，促請衞生署興建中醫診所；王國興就力斥鄧國威言論「政治不正確」，要求對方收回言論，更揶揄鄧國威「要去針灸一吓！」郭偉強亦發炮鬧當局對中西醫有雙重標準，要求「攞局長個腦洗一洗！」

無端端被「針灸」兼「洗腦」嘅鄧國威就急忙補鑊，除澄清絕冇歧視中醫外，為息事寧人惟有承諾會檢討過時政策，但時間表、路線圖欠奉。委員會最後喺六票支持，零票反對下，通過無約束力議案，促請政府立即檢討冇為公務員提供中醫藥服務嘅過時政策。