政壇：岑智明常備相機為影雲

今年係香港天文台成立一百三十周年，將會舉辦連串活動慶祝，台長岑智明尋日同傳媒茶敍時，就好興奮拎咗本即將派畀中小學嘅《百變雲彩》圖書出來，原來入面收錄咗佢嘅私人珍藏。話說幾年前佢喺尖沙咀美麗華寫字樓工作嘅時候，有兩次畀佢捕捉到罕見嘅「莢狀雲」同「貓眼雲」珍貴畫面，佢笑笑口話，香港暫時只有呢兩舊雲嘅雷達影像，換言之係相當珍貴。

岑台長透露，曾試過去大嶼山成日，就係為咗等特別嘅雲出現，佢依家會隨身帶備數碼相機甘願為舊雲而做龍友！近期佢為籌備今年七月至九月舉行嘅天文台歷史展覽，自掏腰包花幾百元買咗兩張十九世紀嘅仿製維港俯瞰圖，可見到天文台開台時嘅所在地。