政壇：蔣麗芸忽然自爆有繼女

立法會議員Ann蔣麗芸講嘢向來聲大大，好似阿媽教仔咁有威嚴，但佢尋日講起本港接連發生逆子弒親嘅倫常慘案時，居然自爆育有一個「stepdaughter」（繼女），但至於佢同繼女嘅關係就不願多講。

據知阿Ann同梁海明結婚十六年，當年結婚時已年屆四十二歲，所以生兒育女嘅嘢實在好難講。對於繼女嘅一切問題，佢似乎不願多談，即使記者打蛇隨棍上，八卦吓佢兩母女平時點樣相處，佢都封口唔講，更將個波交畀身旁嘅好姊妹Starry李慧琼添！

Starry亦好識做咁幫阿Ann解圍，慨嘆自知作為「三料議員」好忙，但都盡量抽時間陪囡囡傾吓偈。佢話好多家庭即使身處同一間屋都變身「低頭族」。