政壇：黑英撐港農倡復耕

政府成日吹噓香港係國際大都會同金融中心，但就連食水都要倚靠內地，更莫講話農產品。天文台前台長「黑英」林超英就話，香港人嘅視野已由「生活」縮窄到「只剩下錢」。之但係錢唔係想像中咁萬能，事關萬一發生饑荒，錢相對米糧係一啲價值都冇，大家都自身難保時冇人會以米糧去換金銀珠寶咁話。佢仲話係時候要重新檢視農業喺香港嘅地位，莫非佢想叫食物及衞生局局長高永文搞起香港農業？

黑英日前喺一個講香港農業嘅論壇上發言，題目係《香港農業︰新時代新角度》。佢話自從香港經濟起飛之後，香港人嘅視野就由「生活」縮窄到只係剩番「錢」，政府亦都一樣將農業判別為「經濟」活動，而忘記咗農業係食物來源同生存嘅必需物資，任由本港農業自生自滅，甚至喺發生禽流感後作出嚴格管制，以為眼不見為淨，變相「誤殺」家禽業。

叫高永文「做嘢」

香港冇農業，乜都靠外來輸入。黑英就提醒大家，有錢唔係萬能，因為鬧饑荒時，各國自身難保，到時有錢都未必換到米糧。佢仲話就算唔鬧饑荒，嗰啲嚟自內地或所謂先進國家嘅食物都問題多多，農藥、激素、塑化劑、重金屬，各種千奇百怪嘅人造化合物多到數都數唔晒，所以除咗以備不時之需，喺保障香港人健康嘅角度，本港都應該有一定生產力同規模唔細嘅本地農業。

黑英仲警告，如香港繼續淨係識講金融中心、以為發展就係建屋炒賣，係「想錢想到發瘋」。當香港人冇得食，忙到冇人嘅生活，全港有石屎、無田野，香港就會變成「食不飽、熱死你」嘅不宜居城市，所謂「香港是國際大都會」都只係一句虛話喎！唔知黑英呢番話，踢唔踢得郁高局長呢？