SUN世代:靚靚韓風

成功源自膽識,勇於改變才可走出新路;然而人愈大,卻愈不敢冒險。洪翠玲(Joey)中五畢業就從事文職工作,本是個安分OL,一次韓國旅行讓她眼界大開,見有機可為,果斷的她毅然辭去安穩工作,成為美容產品代理商。走過荊棘,六年後她驀然回首:「趁年輕去試去做,就算失敗都唔會後悔。」

「做文職好穩定,但日日朝九晚五,打字計數,真係好悶。」Joey甫踏出社會,就是做秘書;但辦公室工作沉悶刻板,追看日韓劇集成了她下班後的娛樂:「放工之後已經好攰,無咩娛樂,咁啱當時開始興韓劇,我就日日煲《浪漫滿屋》!」煲劇時,她留意到韓劇女主角的妝容精緻透亮,肌膚吹彈可破,愛美的她馬上搜羅韓國的化妝品及護膚品,可惜當時香港代理的韓國美容產品非常少。

恰巧當時Joey有朋友在韓國留學,並邀約到韓國旅遊,她當然趁機觀摩這個美容王國,並發現韓國美容產品琳琅滿目、價廉物美,就看準商機,回港後開設網店,出售韓國貨品,更拜託在韓國的好友幫忙:「個朋友幫我搜羅最新最好用嘅產品,當時香港開始吹韓風,好受歡迎。」網店生意愈做愈好,贏得不少客戶口碑,半年後Joey索性辭去秘書一職,專心經營美容生意:「平日要返工,放工後又要同客人約時間交收,真係好攰。我想專心發展自己鍾意嘅事業。」

Joey用積蓄開設零售店,從入貨、運輸到售貨,事事親力親為,然而「創業容易守業難」,足足半年店舖都沒有錢賺,但她沒有放棄,嘗試將產品變得多元化,定期從日本、韓國、台灣、澳紐及歐美等地引入各種新式美容產品,及取得多個美容品牌的香港獨家代理。

「成功無捷徑,要爭取獨家代理,必須同當地品牌廠商打好關係。」Joey定期會到韓國探望當地廠商,還會送禮:「韓國人好高傲,即使送好名貴嘅禮物,佢哋都會嫌棄,但唔送又會唔高興。」曾經有一次,她到韓國與廠商會面食飯,席間廠商將很辣的餸菜夾到其碗中,並示意要賞面吃。其實Joey不太嗜辣,但也要忍辣吞下去:「如果唔畀面食,分分鐘會無咗個獨家代理,到時候失去嘅可能唔係一單生意,而係我嘅事業。」

聽着Joey訴說這六年來的經歷,感受到眼前這位女孩渾身都是勇氣。「依家公司有九成貨品係來自韓國,價格可以同當地門市媲美,客人都唔使去韓國買,方便得多。」面對需求上升,現時Joey更經營批發生意,實行零售、批發一條龍:「有內地嘅化妝品店一個月買三千支BB Cream,需求好大,我就做埋批發訂貨同送貨去內地嘅服務,開拓客源。」

為了解市場需要,Joey會跟客戶保持聯絡及聆聽意見,以作改善:「我會問番個客產品好唔好用,作為入貨及選貨嘅準則,畢竟美容生意都係靠口碑,要以客為本。」Joey今年目標是開設美容院及髮型屋。她自言很久沒放假,但一點也不覺累:「做自己鍾意嘅事,從來都唔會累。」

Joey's Profile

現職:OP Beauty創辦人

興趣:上網

第一手消息請下載on.cc東方互動iPhone/iPad/Android/Windows Phone Apps

翁明詩 

Joey

在韓遊歷期間,洪翠玲認識了不少韓國好友(右),每次到韓國公幹也相約一聚。

Joey(中)每月都會赴韓與當地的護膚品廠商開會,商討代理事宜。

到韓國開會,Joey(右)的好友都會幫忙翻譯及搜羅新產品。(受訪者提供)

Joey在韓國街頭看到偶像紙牌也忍不住合照。