SUN搞作：打橫嚟講：鄧忍光有曾雀屎風範

由香港前特首貪曾煲呔委任入香港電台做阿頭的鄧忍光，極有曾雀屎的風範，在記者面前點樣畀人「質」都面不紅、耳不赤，厚顏地講叫人齒冷的官話。佢多番強調自己是獲任命的公務員，只會忠於上頭，完成交落嚟的任務，好一副交心嘴臉，像個有大佬照嘅黨員，多過似一個有是非觀、知羞恥、會維護社會價值的香港人。

貪曾之所以不得人心，就係佢只懂縮骨，視特首工作為洗公廁般的任務，做好呢份工就是！表面聽話聽教，接order交差，暗地裏私自搵着數，吃裏扒外。若你哋唔滿意，唔好同我講，搵我上司port我囉（正字應係report）！我打工㗎咋！

鄧忍光的原罪，不特止是蹂躪香港的新聞自由，還學足貪曾不理港人的福祉，將一派奴才本性發揮極致；若只為自己官途而出賣人格咁都掂嘅話，這種意識才最禍港呀！

究竟，香港公務員體制發生乜嘢事，何解專門培訓埋一群這麼劣質的高官嘅？做狗聽話就有得升職，不肯做違背自己良知的事嘅人，就被寫花「快勞」，無得升，這是乜Q嘢制度？

鄧忍光的另一PK，就係佢不懂傳媒工作而做電台總編輯台長之外，最大鑊的是佢辦事能力極差，派佢去和諧港台，佢居然不知要低調鬼祟的進行分化，卻因急功近利，愛表現而由內部矛盾演變為公開的敵我矛盾，揚言成為國際醜聞，令祖國尷尬，真係同貪曾一樣，唔死都無春用！

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府