政壇：搞搞政：屎橋公帑請客貪曾超縮骨

貪盡海陸空嘅「貪曾」出晒名孤寒，無時無刻都算死草、諗縮數，政府裏面相信都冇人唔知，最近我哋又收到風，大爆貪曾疑用公帑大排筵席當自己請嘅醜事。話說一○年貪曾高調帶領一眾高官「起錨」宣傳一二年政改方案，政改最終獲通過，據聞貪曾竟轉死性，拍晒心口咁話要好好慰勞班喺「起錨」行動中有血有汗嘅政策局成員食飯，喺跑馬地馬會會所食自助餐。

正當大家都驚訝點解貪曾忽然闊佬，到咗飯局當日，謎底終揭開喇。話說佢邀請嘅七、八十個來自政制及內地事務局、民政事務局、律政司同新聞處等部門嘅官員，佢哋發現席間竟然有幾個非政府架構嘅街外人同場出現，呢幾個人同「起錨」行動冇乜關係，極其量只係幫過一兩次手搞活動。呢次飯局本來只有政府內部人士知悉，外人基本上冇可能會知道，就算知都冇可能會畀佢入場。

大家於是猜測，貪曾咁識得鑽政府規矩嘅空子，一定係知道倘若淨係請同事食飯，冇得開公數，但只要請多幾個外人，將飯局嘅性質改為「請客」，條數就可以理所當然咁動用公帑嚟找，自己就一個仙都唔使出。當年有網民將「起錨」標誌改做「超錯」，睇怕應該改多個「超縮骨」。