政壇:網民圍插鳳凰衛視記者

李克強尋日首度以國務院總理身份舉行記者會,唯一提到香港問題嘅記者,就係嚟自鳳凰衛視嘅胡一虎,但佢提問嘅開場白立即引起網民圍插,話佢擦鞋。事緣呢位曾獲選最性感男主播留意到李克強打手勢超過三十次,令佢諗起十一年前採訪過仲係河南省省長嘅李克強,佢大讚當時嘅總理展現出「自信同睿智」,又話自己同李克強都係安徽人。其實佢係想問,李克強上次來港派「禮包」,仲會唔會有呢個措施。

無論係內地定香港網民,都對胡一虎嘅「提問」劣評如潮,批評佢一開始已攀關係兼擦鞋,忘記晒記者要提問嘅天職。內地網民亦睇唔過眼,覺得佢浪費晒寶貴嘅發問機會,話鳳凰衛視搞到自己喉舌機構咁款。有香港網民話好彩呢次係鳳凰衛視,唔係真正香港傳媒發問,因為鳳凰衛視只係一間設立在港嘅媒體。

除咗胡一虎之外,有美國《紐約時報》記者亦投訴,佢哋未獲中國政府嘅邀請,參加尋日場記者會。有個講法話,自從《紐時》早前披露溫家寶家族財產狀況後,《紐時》喺內地採訪已變得困難重重,唔知呢次《紐時》被禁入場,是否與此有關。

第一手消息請下載on.cc東方互動iPhone/iPad/Android/Windows Phone Apps