政壇：李慧琼潛行京城

全國人大同政協「兩會」雲集政經猛人，絕對係建立人脈關係嘅好機會，所以每年都有啲非人大政協自行到京城，一嚟同政經好友聚一聚，二嚟亦可以認識新朋友，不過今年有位新鮮人到京城就引起啲「小騷動」，講緊嘅係身兼建仔副主席嘅「三料議員」Starry李慧琼。

酒會期間滿場飛

建仔主席兼立法會議員譚耀宗係全國政協委員，建仔喺京城舉行酒會，譚Sir作為主人家當然要坐鎮啦，現身一啲都唔出奇，之不過，事關Starry本身非人大政協，突然現身建仔喺京城嘅酒會之餘，之後仲逗留咗至少七日先離開添！咁就有啲奇怪嘞！

當日有份出席建仔京城酒會嘅全國人大及政協形容，Starry喺酒會期間滿場飛，講笑話好似去年九月立法會選舉後，出席各大團體活動時好似謝票咁，既然有出席者講到咁繪影繪聲，我哋當然要搵Starry求證吓真假。佢接受查詢時坦承，自己舊年冇出席建仔酒會，今年主要係自己有興趣所以出席，不過，除此以外仲有啲私人事務，所以前後大約逗留咗七日，呼籲大家唔使有太多揣測喎！

查實建仔嘅領導層換屆在即，加上京官亦換上新面孔，Starry呢次上京城，或多或少都遇到新知舊雨，至於期間會否見到啲京城重量級人物，呢個真係邊個都講唔準，或者只有天知地知，同埋Starry自己至知，總之就係「不能爆的秘密」喇！