SUN搞作：少膽虫手記：大眾情婦

呢排唔知市道好定少膽虫唔好，一個二個十九編輯都話劈炮唔撈，好在《爛果》不嬲信奉「做X死人」精神，留低嘅咪做埋佢囉，反正我哋係要交數唔係要質素，睇得《爛果》，心照啦。

其實好似《爛果》咁爛嘅機構，真係應該多啲換血，先維持到創作新聞嘅活力。呢幾年，我大大話話都in過幾十個懵仔，有啲坐低就話自己對新聞好有熱誠，有啲又話份工好啱自己發揮，我通常都會好認真咁見完佢哋，然後返上樓，同淫黎一齊哈哈哈哈哈哈哈，笑Q佢哋。

大佬！你哋知唔知自己見緊乜嘢工呀！《爛果》呀！講熱誠講發揮，去正義傳媒啦！其實淫黎開檔之初，就親口問過我：「虫，你知唔知我當《爛果》係乜？」有良心嘅老細，梗係當親生仔啦，但係我跟得淫黎呢條淫蟲，知佢連阿婆都唔放過，就好醒咁答：「係情婦！」淫黎當時真係呆咗一呆，然後報以一個覺得我有料但係又未夠班嘅眼神。少膽虫見住佢插喺褲袋嘅左手咗兩，然後就好興奮咁話：「係大眾情婦。」

少膽虫真係服。當《爛果》係情婦，係洩慾工具，日日夜夜宣淫販賤滿足自己，少膽虫以為已經好巴閉。淫黎就高層次呢！覺得宣淫販賤要大眾化，要三歲到三百歲都洗晒腦，齊誨淫誨盜。你話成個社會都畀淫賤氣氛包圍，《爛果》點會企唔住？

講番轉頭，淫黎真係要多得嗰班抱住理想入職嘅編採懵炳，畀《爛果》當淫媒咁訓練仲以為學咗嘢，對社會有貢獻。讀埋咁多書，真係讀壞腦。