Sun奇古怪：Sun潮語：暴走

每一個地方嘅文化，又或者每一個有文化嘅地方，除咗發源地之外，少不免都會受外來地方影響。現代世界所存在嘅文化體系，大多數都唔會話自己係純種，除咗係响非洲大陸嘅少數民族，又或者係响與世隔絕嘅瀕危少數民族外，所有現世响呢個星球生存緊嘅文化，其實都係經過歷史過程演變而成，過程包括遷徙征服同文化抗爭保留融合再創造，而成為今日各種東西方不同嘅文明。以前啲人成日話，香港係文化沙漠，但其實佢哋無留意嘅係，香港開埠一百七十幾年，由中國新安縣一個丁屎咁細嘅小村落，發展成今日一個國際都會，我哋香港就係最叻將唔同地方嘅文化，兼容並包，衍生出一種自己獨特嘅香港文化，呢樣嘢絕對比我哋嘅GDP，又或者比李慧詩更值得我哋自豪。香港文化最強嘅地方就係好容易將其他地方嘅嘢本地化，然後據為己有成為自家所出，食品係咁，風俗習慣係咁，當然語言文字都係咁。其中，可以將日語漢字本地化，並當作日常使用，亞洲地區除咗台灣之外，就係香港。「暴走」呢個潮語就係其中之一。「暴走」呢個潮語係來自日文，字面意思係喪跑。然而，日語「暴走族」嘅意思即係一啲會飛電單車嘅不良少年，「暴走族」會將一啲平價電單車改裝，好多時更係非法改裝成一啲馬力較大嘅機車，然後聯群結隊地開快車招搖過市，係日本一種次文化。「暴走族」或「暴走」呢個詞經動漫作品傳到台灣及香港呢啲漢語地區。

「暴走」呢個詞就開始潮起嚟變成形容詞，用嚟形容一啲較為癲狂嘅行為同反應。潮語「暴走」今時今日，變成突然發癲嘅代名詞，表達一種好似喪跑喪癲嘅瘋狂狀態。

好似一個為撲奶粉嘅瘋狂爸爸可稱為「暴走爸爸」。甚至喺華文社會，仲會叫一啲瘋狂嘅行為叫做「大暴走」！例如，提出佔領中環嘅戴耀庭教授，最近經常游說叫人參與嘅行為叫「佔領中環大暴走」，相信亦唔會有太多人介意。