政壇：政商定格：馬唯中鄰家女孩Look搭小巴

有台灣第一千金之稱嘅馬唯中近日傳出婚訊，盛傳佢放棄學業下嫁性感男模蔡沛然，仲喺香港定居添！尋日我哋就喺中環堅道見到一身平民打扮、似足鄰家小女孩嘅馬唯中，雖然貴為台灣總統馬英九千金，但佢既冇保鏢陪同，亦冇座駕接送，僅以小巴代步。傳為佢丈夫嘅蔡沛然就喺夜晚九點幾搭的士返到堅道住所，兩人同樣冇回應任何問題，但對記者禮貌周周。

蓄短髮、戴黑色膠框眼鏡嘅馬唯中尋日出現喺堅道萬翠花園附近，着住一件灰色印有唐老鴨圖案嘅衞衣，襯上牛仔褲同波鞋，揹上米白色帆布袋，清純簡樸嘅佢左手無名指戴咗一隻戒指，睇嚟佢同蔡沛然嘅婚訊已成事實。獨自出外嘅馬唯中上咗架由薄扶林去中環碼頭嘅小巴，問佢去邊，伊人未有回應，只係禮貌揮手同微笑，全程望向車窗外面。到達中環碼頭總站後，佢冇落車，行去車頭再入張二十蚊紙落錢箱，最終搭架車去咗香港大學，步行去港大馮平山樓嘅美術博物館。半個鐘左右，佢就離開，今次則係步行十分鐘返去堅道屋企，上樓前特登同記者講咗句拜拜！

夜晚九點幾，馬唯中嘅另一半蔡沛然乘的士返抵，佢急急腳行入大廈，見到我哋都好愕然，不過，都禮貌講聲：「謝謝！謝謝！」鞠個躬先返回樓上住所。