政壇：搞搞政：高官換車「色」誘區璟智

新一屆政府最近開始為司局長同常秘級高官換車，購入數十輛凌志（Lexus）GS450h行政級房車，取代用咗至少七年嘅福士（Volkswagen）頂級系列「輝騰」（Phaeton）豪華房車，最特別嘅係有多款原廠顏色供官員自行選擇，呢一着估計女性高官最開心，好似財經事務及庫務局常任秘書長區璟智就喺揀車嘅時候維持佢平素嘅繽紛形象，揀咗架搶眼嘅棗紅色凌志。

消息指，由於政府購買新車係免稅，凌志GS450h售價只係四十幾萬元，雖然車廂內籠比之前嘅福士或寶馬七系就較為細啲，但可做到低耗油環保目標，但裝潢豪華，有錶版投射跳字錶。消息仲話，運輸及房屋局局長張炳良同廉政專員白韞六等都有份換車，不過，可能係男士講求穩重，佢哋不約而同揀咗架平實嘅黑色凌志。

仲記得政府上次換車大行動要追溯到○六年底，購入近五十部德國生產嘅「輝騰」3.2L豪華房車，期間先後有多架新車行行吓就有事故要返廠維修，搞到事後機電工程署要全線檢視同型號車輛。事隔七年，呢批凌志會唔會有另一番表現，就拭目以待喇。