政壇：鬍鬚曾被問中產耍太極

發表預算案時，財爺曾俊華因為一句「我都係中產」引來好多質疑，尋日，佢出席青協網上節目論壇時，有青年再就中產一事追問佢︰「政府會唔會設中產線，司長同我哋對中產有唔同定義，設中產線可以了解中產嘅需要。」曾俊華今次冇再避答，話佢其實出身中產家庭，對中產很關注，但就冇回應會否設「中產線」，只係叫同學「應集中讀書，做好啲。」

中產之外，啲青年最關心嘅都係教育政策，財政預算案中，政府宣布設立四億八千萬元種子基金資助本港二十名尖子到海外升讀大學，參加論壇嘅青少年紛紛質疑名額太少，有啲認為應該把資源用以增加本地資助大學學位。梁同學更話，佢就讀嘅中學日久失修，曾有同學被剝落石屎擊中頭部，批評政府「點解有錢畀二十個尖子去外國，冇錢畀本地學校去保障香港學生嘅安全？」

鬍鬚曾冇正面回應佢嘅質疑，但就將波踢畀教育局局長吳克儉，話吳局長會處理。與會亦有青年問呢個尖子計劃會否擴展至中學生，鬍鬚曾就再次耍太極︰「媽咪未必捨得咁細個去讀書。」