政壇：神秘買家鍾情唐唐紅酒

新任全國政協常委唐英年早前割愛，將一批收藏已久嘅靚紅酒拍賣，佳士得尋日舉行名為「尋味之旅，唐英年窖藏珍釀」嘅勃艮第專場拍賣，吸引唔少紅酒愛好者出席。最受矚目嘅紅酒係羅曼尼．康帝（Domaine de la Romanee-Conti）1995年，最終以全日最高成交價、估價上限嘅一百萬元成交，加上買家佣金共一百二十一萬元。至於第二高價嘅紅酒批次則為七十萬元。

拍賣紅酒出價高到一百萬元，究竟呢位買家係何方神聖呢？聽聞呢位一千零十七號神秘買家來自亞洲，尋晚透過網上出價競投，除買咗羅曼尼．康帝1995年呢個批次外，仲購入來自同一酒莊至少十批貴價紅酒，睇嚟呢個神秘買家對呢個酒莊真係情有獨鍾。

拍賣品中最平嘅紅酒批次起步價只係七百五十元起，估價上限為一千四百元，最終有人以超過估價上限嘅二千六百元購得。錯過咗尋日拍賣專場嘅朋友都唔使失望，因為呢個拍賣專場今午會繼續進行。