政壇：推遲出版《選擇》月刊 消委會一姐引火燒身

消委會總幹事早前換人，新一姐黃鳳嫺上場之後，好多人都關注佢會唔會新官上任三把火。尋日（十五日）係國際消費日，亦適逢消委會刊物《選擇》每月十五日出版嘅日子，但係今期《選擇》卻冇準時出版，原因係新一姐上場後引入新玩法，只要十五號撞星期五，就自動延後喎，即使一年一度嘅國際消費日都係咁話。據悉呢個決定喺消委會內部都引來一啲反彈，估唔到一姐第一把火就燒番轉頭。

配合國際消費日變明日黃花

點解黃鳳嫺甫登場，就要引入呢個改革呢？原來佢上任後，考慮到家吓免費報紙愈來愈多，但唔少免費報章星期六都冇出紙，為咗令消委會嘅工作透過更多傳媒讓更多市民得悉，所以消委會近日決定以後凡十五號撞正周五，該會都不會出版《選擇》月刊，延後到之後嘅周一先出版。由於呢個調整，《選擇》月刊嘅訂戶都要遲收貨。

據了解，呢個決定喺消委會內部都有分歧，有職員對上述安排亦有微言，特別尋日係國際消費日，部分同事覺得即使引入新安排，亦應該彈性處理。尤其係今期新書嘅內容中，都有配合國際消費日嘅報道，延後出版，相關內容見刊時難免畀人明日黃花之感。

消委會解釋，因早前收到反映，指不少報紙周六不會出版，如果《選擇》月刊周五出版及開記者會公布詳情，好多傳媒都唔去採訪，所以先至有此決定喎。發言人又指，今期《選擇》其實有文章談及國際消費日，可惜未趕及同日發放有關資料。為咗就免費報，而錯過一年一度嘅國際消費日，黃鳳嫺同消委會呢個決定真係世事難兩全嘅寫照。