政壇：政商定格：鄭汝樺退休逍遙不問政

運輸及房屋局前局長Eva鄭汝樺舊年六月底離開政府後，鮮有喺公開場合露面，尋日佢出席尖沙咀聖安德烈堂擴建籌款活動時，談及退休生活就侃侃而談，但當問及現屆政府施政同菜園村路權風波時，佢就變得非常謹慎，話依家已退休，唔想對現屆政府指指點點，其後被問及菜園村路權風波時，佢一面話政府已發咗聲明，叫大家睇吓，另一方面又叫大家去問番新界鄉議局主席劉皇發。呢啲咪係不在其位，不謀其政囉！

講番聖安德烈堂，原來Eva細個都係返呢間教會，仲認識咗依家嘅老公。佢仲話依家生活好充實，閒時有打網球、打乒乓球、寫書法等興趣，加上佢本身係教徒，所以有參加同帶領查經班。