政壇：政商定格：恒豐搬竇換薄芒慳地方

唔淨止街頭「茶記」或手工藝舖，連一眾食開大茶飯嘅金融界朋友都覺得捱租好吃力！立法會議員張華峰嘅恒豐證券，下星期一起正式搬到新office營業，恒豐證券研究部董事Simon林家亨話原因咪就係要慳成本咯。

恒豐證券個舖依家喺中環皇后大道中100號，大家都可以估到有幾貴，嚟緊就會搬去皇中三十九號嘅豐盛創建大廈，Simon呻話業主一租約期滿即刻再加租，惟有搵個平啲嘅位啦，佢話新舊舖嘅平均每呎差距有成二十蚊o架。

佢仲話新寫字樓離舊舖只有兩分鐘路程，唔使驚以後放lunch唔方便，但新寫字樓會細少少，而恒豐已將俗稱「大牛龜」嘅舊式電腦換薄機，所以會減輕影響，而個舖嘅裝修已經做好九成，今個星期六同日，班伙記就會正式搬嘢入去，相信老闆張華峰已經搞好新寫字樓風水喎！