政壇：搞搞政：范國威少交十蚊稅罰三舊

保衞香港自由聯盟尋日喺中環開設街站，呼籲市民參與不合作運動，喺繳交第二期稅款時少交十蚊，以示不滿政府施政。聯盟成員兼立法會議員Gary范國威就自爆有響應聯盟號召交少十蚊稅，但佢就懵盛盛，喺第一期交稅時已交少咗十蚊，於是被稅務局打電話問佢係咪交錯稅。

Gary講明係刻意交少啲稅，但聽到稅局職員一頭霧水，惟有同佢講第二期稅要罰多三百幾蚊，仲話會發信叫佢盡快清還喎。不過，Gary話喺下月交第二期稅時，將會照辦煮碗交少十蚊稅，抗議政府罔顧民間訴求。佢仲話為檢視活動成效，將會喺七月前喺立會提出質詢，要求稅局交資料，睇吓有幾多市民響應活動喎！

根據《稅務條例》第112章，如果市民冇依足應繳交嘅稅項，就會被視為拖欠稅款，稅務局局長可以即刻根據《稅務條例》第 XII 部嘅規定採取法定追稅行動， 包括徵收百分之五附加費、向僱主在內嘅第三者發出追收稅款通知書，或用法律行動收番筆稅款，奉勸市民真係唔好以身試法喇！