政壇：范太多反對票眾說紛紜

全國人大常委范徐麗泰尋日以二千七百九十張贊成票，近九成半得票率成功連任，但反對票同棄權票合共有一百五十一票，其中反對票多達一百二十四票，較五年前嘅四十二票，急升近兩倍。范太事後承認非高票當選，估計可能同自己嘅言論唔係好啱聽有關，但自言會繼續發聲，唔會為咗要令大家開心，甚至係討好有選票嘅人而就住嚟講，因為佢過唔到自己個關喎。佢打開心扉直認反對票增加同自己年紀，甚至乎係同自己言論有關，但佢嘅人大同僚都爭相為佢解圍。

身兼行政會議成員嘅人大羅范椒芬話，范太得票較上屆多同批評特首梁振英無關，又估計部分人大投票時，傾向剔走年紀較大嘅候選人。另一行會成員鄭耀棠就認為范太五年前首次當選時，好多人大都未認識佢，但五年過後有較多人認識佢，自然會有較多意見，因此而投反對票都未定。

但要數最有創意嘅解讀，就係人大新丁、新界社團聯會理事長陳勇，事關佢解讀范太嘅得票同「限奶令」呢個嚴厲措施有關，內地市民同網民有啲反應比較大，所以有啲人大就作出「呢個表達」喎！