SUN搞作：打橫嚟講：破解唐唐返港之謎

在人鬼兩不分的怪獸都市裏，世情之矛盾詭異，荒誕奇幻，咱們若稍不留神，就好容易以為撞邪見鬼，或自己患了嚴重精神分裂症！

唐英年的地下深宮被揭發僭建後，其賢妻獨攬罪名上身，一力承擔；而「屋主」唐先生則又偉大極致地宣布自己有腰骨有膊頭，會「全力支持」老婆面對此「飛來橫禍」，一定一定會「親身」陪住太太到法庭受審，無限sweet sweet！令唐太甘心為君死為君亡為君拉入雜差房，無悔今生！

好啦！經典愛情故事的發展，係唐生輸了香港特首選舉，贏得阿爺嘉許，封佢做政協常委，嗱！呢個唔係同情安慰獎，亦非賠償，而係唐生實至名歸的！

因應香港確實要遵守《基本法》原則，二○一七年要畀港人普選特首，此際香港政壇風雲譎詭，綜觀整個香港政府班子，唔係廢柴庸官，就係小人奴才，無誠信、無實力、無遠見、無朋友、無質素、無常識、無品格……的一棚N無弱雞，即使被捧為最打得，民調分數高企的林鄭，五年前，佢只是妹仔一名，對兇險的政改肯定無經驗，遂做過財爺同政務司多年的唐英年，才是「有心有力」的理想人選，去代表阿爺處理這難題！嗱！大家睇到啦！凡涉及「普選」的問題，喺北京兩會期間，有邊次唔係由唐生回應的呢？就係因為佢深得阿爺賞識，所以，就無人通知佢押後上庭聆訊佢老婆僭建的大案囉！令佢不滿無得留在北京參加政協閉幕，因之後全體吃喝玩樂劈酒聯歡打關係，係好重要的嘛！

政治幾變態吖？真黐線！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府