政壇：搞搞政：慢必爭平權爆官場同志

本港首名「出櫃議員」慢必陳志全為爭取性傾向歧視立法，四出演講支持同志平權運動。可惜隨住撐同志旗幟鮮明嘅平機會主席WK林煥光即將卸任，下月接任平機會主席嘅「翻閹廢官」周一鑊，就忽然轉晒口風，竟倒退為先研究、後諮詢，最後先考慮係咪立法，當堂辣慶慢必同一眾關注同志平權嘅團體。

慢必尋日出席論壇時就直指周一鑊開腔幫政府講好說話，透露政府其實對同志平權持開放態度，接手議題嘅政制及內地事務局局長譚志源，更曾喺私人場合向佢暗示，打算喺特首梁振英首份施政報告「show hand」（晒冷），拍板就立法禁止性傾向歧視進行諮詢，可惜計劃最後喺部分宗教團體反對被推倒。

講到慶起嘅佢更大爆官場其實不乏同性戀者，好似現任常秘、前副局長甚至前局長，都有唔少隱形同志，可惜部分人私下向佢透露，擔心一旦「出櫃」會烏紗不保，加上政府嘅態度係「隻眼開隻眼閉」，唔講當唔知，難怪一眾同志官員情願匿喺衣櫃入面，唔敢「come out」喇！嘩，佢咁講，相信勢必再引起「猜猜同志官員是誰」熱潮。慢必又揚言會不惜一切挑戰周一鑊，包括邀請佢擔任來屆彩虹大使，接WK同佢嘅棒。