政壇：日圓跌不停 黎棟國興奮

呢排日圓不停貶值，令到日本線旅遊生意大受歡迎，連保安局局長黎棟國都好興奮話，要搵時間同太太一齊去玩個痛快。原來佢好鍾意到日本旅行，以前每年至少去兩、三次，但自前年日本發生地震同海嘯後，佢只係去過一次咁多咋！

其實黎棟國對外國風情嘅節目都好有興趣，閒時喺屋企經常收睇介紹各地文化嘅節目，動物世界嘅節目亦啱晒佢，尤其是睇人釣魚、捉蟹，特別睇得投入。唔知係咪對佢長期喺紀律部隊工作，經常要捉壞人有啟示呢？

講起出外旅遊，最緊要買啱旅遊保險。佢自爆同太太都試過喺旅遊期間遺失手提電話，好彩佢哋有買保險，唔止冇損失，仲有全新嘅手機用。咦，局長唔見咗手提電話咪好大鑊？佢笑笑口話唔見嘅係私人電話，唔係公務用嘅「黑莓」電話，所以入面冇乜機密，所以大家唔使咁驚訝。