政壇：顏明秀打泰拳KO導師

日前遇到中華廠商聯合會青委顏明秀，發覺佢身形愈來愈fit，原來佢近日愛上打泰拳，大讚收身效果一流，玩咗短短四個多月，全身線條靚晒，肌肉又結實咗好多，更可將身體嘅廢物排走，負能量一掃而空。

不過，佢話自己手腳唔係幾協調，導師叫佢左手出拳，但佢就出咗右手，成日打中導師，令對方防不勝防。咁豈不是盲拳打死老師傅？佢話條腰本身有舊患，早排腰痛復發，苦不堪言，於是的起心肝走去學打泰拳，強化體質。

佢坦言，初學泰拳並唔容易，好似起飛腳踢沙包，踢到一雙腳都瘀晒，每次上完堂都攰到成身散晒，後來肌肉慢慢適應咗，就開始享受到流汗帶來嘅滿足感。