政壇：蘇澤光鍾情低成本電影

究竟經濟發展委員會呢個高層次、跨界別、跨部門嘅平台係點嘅呢？經委會尋日首次開會，身為主席嘅特首CY梁振英就邀請傳媒喺會前參觀同影相，原來高層雲集開會前，首先要決定開會語言同自我介紹，分享嗜好。

委員之一嘅工業界立法會議員梁君彥自我介紹時話係一個半職議員。佢之後解釋，自己唔係全職議員，所以咪係一名半職議員囉。

為令委員之間有較全面嘅認識，CY喺各委員自我介紹時都會講番一兩句註解，當「梁粉」劉炳章介紹自己時，CY仲忍唔住要介紹佢有份成立嘅香港專業聯盟，搞到等緊做自我介紹嘅貿發局主席「Jack蘇」蘇澤光好似有啲尷尬，好彩Jack蘇都有機會同大家分享自己嘅嗜好，原來佢最鍾意拍一啲低成本嘅電影。