政壇：民協建仔啟德搶灘

疑似區議會新選區係兵家必爭之地，各大政團最新目標係前身啟德機場嘅啟德發展區，事關啟德新區合共一萬多個公屋單位今年陸續落成並入伙，呢個現兜兜有望新增至少兩個區會議席，聽聞依家最積極做工夫嘅係建仔同民協，前者有傳正游說立法會議員落戶開辦事處，行先一步做工夫，後者亦有傳不惜搵區議員踩過界都要「插旗」，睇怕啟德新區新票源將有一番龍爭虎鬥。

譚國僑輸九西衝擊大

前身係啟德機場嘅啟德發展區，之前傳過九龍城、黃大仙同觀塘三個區議會想爭奪啟德落戶當區，但聽聞一切已塵埃落定，啟德發展區繼續隸屬九龍城區會範圍，之不過一波平定一波又起，據聞最新戰場係啟德新區新票源。

消息指建仔早於舊年年底已接連發信跟進啟德新區配套問題，據聞為咗更好服務新入伙居民，該黨最近更積極游說立會議員蔣麗芸到啟德開辦事處，倘呢個部署如願以償，建仔想搶灘嘅意圖再明白不過喇！

另外，有地區消息透露，民協對由前深水埗區議會副主席譚國僑喺舊年九月立法會選舉時，僅以數千票之差飲恨九西議席深感不值，為免重蹈覆轍增加票源嘅工作可謂刻不容緩，所以有傳該黨超級議員KK馮檢基正徵求勇士衝入啟德新區，其中一個可能係深水埗區議員黃志勇喎！

話時話，民協不惜搵區議員踩過界都要「插旗」，睇嚟上次譚國僑嘅落敗對佢哋有幾大打擊，倘若民協喺啟德新區掘到二、三千票，KK又繼續如願連任超級議席嘅話，下次可望打破「一人黨」嘅困局喇！