SUN搞作：打橫嚟講：大陸高官的「愛國行為」

大陸高官日以繼夜、夜以繼日，時時刻刻勸勉所有中國人（包括台灣、香港、澳門及移咗民享緊福的外籍華人）都要「愛國」。

學理上的「國家」觀念，甚為複雜，有地理上的、文化上的、民族上的，或種族、經濟，同政治的，都有排釐定，故此，「愛國」是愛乜呢？連愛甚麼亦未搞清楚時，點愛呢？大佬！

大陸高官成日嗌愛國愛國，咁！佢哋又知唔知點做謂之係「愛國行為」呢？查實，中國的高官「愛國行為」係好易做o架啫：

首先，一世不移民，子女也不得攞定外國護照做逃生門準備，出咗國的，要佢哋速速返嚟；一世只用中國貨，規範子孫只准飲用中國生產的奶粉；將家中所有日本電器，同包無格仔的四仔通通即時掉出家門；立刻坐隻快艇，湧上「尖閣諸島」插旗，替祖國捍衞國土；見親日本妹、美國佬呢類外國勢力人士，就見一鑊×一鑊，為國爭光；終身不再着洋服西裝，只穿唐服，文革時期的工人裝也不錯；所有中國子女不得出國留學，全部只許接受中國本地愛國教育，免受外國不良思想毒害；一係學岳飛咁，叫阿媽喺背脊度篤番「盡忠報國」幾隻字，一係學屈原到江邊跳海；為表與民「憂戚與共」，齊齊食毒菜芯、飲地溝油、蹲在街邊吐痰……

若覺得上述行為有難度，我可提供簡單易做的，就係帶頭申報財富，即使身家豐厚也照報，咁至愛國嘛！咁都做唔到，就請勿再叫人愛國囉！唔該！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府