政壇：搞搞政：賤價批地遺禍 吳克儉如履薄冰

話說特首CY梁振英尋日約見部分泛民立法會議員共進早餐，期間放風話政府計劃將用途一直備受爭議嘅粉嶺皇后山地皮，正式拍板用作發展本地私立大學。

舊年本報揭發貪腐醜聞不絕嘅「貪曾」前特首曾蔭權爵士，當年藉推動教育產業為名，未經公開諮詢就以賤價一千元批出屯門掃管笏一幅市值十四億元嘅靚地皮，予英國貴族學校哈羅作校舍。哈羅其後更獲批二億七千幾萬元免息貸款建超豪校舍，惹來非議，新民黨葉劉淑儀當時更炮轟貪曾唯利是圖，令本地教育產業「只有軀殼而冇靈魂」。隨住貪曾下台，加上佢催生嘅教育產業備受爭議，新政府上場後就嘗試撥亂反正。就因為咁，據聞教育局對皇后山地皮預留作發展高等教育時都步步為營，絕唔容許再有明益外國辦學團體嘅醜聞發生。政府明白興建外國貴族私校無助本地教育普及化，所以向有本地辦學經驗嘅團體招手。

由於皇后山地皮現時仍為爛地，政府為吸引更多辦學團體加入競爭，決定孭起該地皮附近基建嘅費用，等學校專心辦學。貪曾任內積極向權貴輸送利益，估唔到佢嘅惡行禍延新政府，今次教育局局長吳克儉就首當其衝，貪曾認真累人累物。