政壇：新同盟踩白鴿區選唔掂

沙田區議會田心選區補選塵埃落定，白鴿黨丁士元輸公民力量潘國山幾條街，認真羞家。新民主同盟一班區議員尋日同傳媒聚會時都有傾呢單嘢，召集人鍾錦麟話一早知道該區嘅建制派安全系數好高，只不過估唔到白鴿黨得五百幾票咁少啫！

新同盟一早估到白鴿黨會輸到七彩，因白鴿黨喺區選只懂打政治牌，而街坊就想要個幫到手嘅「區保」。所以舊年立法會選舉，白鴿黨劉慧卿喺田心選區攞到七百幾票，但今次丁士元連呢七百票都冇。唔知白鴿黨高層，今次聽唔聽得入耳呢？

其實泛民都知二○一五區會選舉好大隱憂，分分鐘全軍覆沒，所以幾大泛民政黨已圍埋商討「協調機制」免出現撞區情況。但新同盟就未肯加入，佢哋認為要打破舊傳統，如果舊人連續兩次落敗，就應該讓路畀其他泛民政團，或者以民調分析邊位泛民勝算最大。查實泛民政黨中，係得白鴿黨候選人輸完又輸都繼續參選，所以新同盟今次似乎係瞄準白鴿黨開火囉！