政壇：控煙辦殺上長毛辦公室

眾所周知，立法會議員「長毛」梁國雄係煙民，早前被自己友影到疑似喺立法會辦公室吸煙，好彩最後立會秘書處冇追究，只係口頭勸喻。但尋日我哋就發現有兩位控煙辦人員喺立會十樓走來走去，最終去咗長毛間辦公室，但又唔係突擊巡查或提出檢控，原來只係向長毛派發禁煙宣傳單張。

由於當時長毛唔喺辦公室，控煙辦人員只好放低宣傳單張就離開，原來長毛好乖咁落咗街吸煙。但奇就奇在控煙辦去立會只係向長毛一位議員派傳單，似乎係衝住佢而來。我哋問控煙辦點解選擇性針對長毛，係咪收到投訴呢？有冇向其他議員派傳單？點解唔檢查埋其他議員呢？兩位控煙辦人員都一一拒絕回應。