政壇:國教中心出招覓支持求續命

由楊耀忠擔任會長嘅香港教育工作者聯會,屬下嘅國民教育服務中心出版《中國模式國情專題教學手冊》掀起連串國教風波後,舊年已被迫暫停服務。不過教聯會屬下另一間位於大埔嘅國民教育中心,同教育局簽訂嘅服務合約將於今年六月底屆滿。據知,為免影響早已預約本學年活動嘅百幾間學校,當局依家係以一元象徵式租金,繼續租畀原址國民教育中心,但就唔會再提供公帑資助,中心要自負盈虧。

為求「翻生」再攞政府資源,國民教育中心上星期五發咗一張標題為「誠邀支持中心事宜」嘅通告同問卷回條,畀多間中學、小學及幼稚園校長,首先自讚咁話國民教育中心秉承「認識國情,提升素質」兩大宗旨,竭誠為香港教育界服務;設計多項活動畀學生同老師參與,讓學生了解國情,提升素質。

反國教組織憂心

通告又特別抬舉各校長貴為「教育翹楚,享負盛名」,所以期望得到各校長支持,為國民教育中心填寫「支持信」,並提出寶貴建議,等中心可以同學校配合「持續為學界服務」。即係話中心要續命,咁最終會得到幾多個校長支持,就要等本周六先揭盅喇。

教聯會主席黃均瑜話,依家只係收集學校對國民教育中心嘅意見,「如果學校認為中心無需要存在,咁我哋咪唔辦落去;如果認為我哋有存在嘅需要,咁我哋會將學校嘅意見,轉交教育局申請續約」。

但部分反國教科嘅組織就好憂慮,國民教育家長關注組召集人陳惜姿擔心國民教育中心如果成功「翻生」再獲資助,又會搞一啲「唱好」祖國或內容偏頗嘅活動,該組織將密切監察。學民思潮昨晚亦發表聲明,擔心教聯會此為未來重新喺學界推行洗腦教育嘅政治手段,要求教聯會同國民教育中心回應事件。

教育局發言人表示,對於大埔國民教育中心嘅日後發展,當局會先研究學校對服務的需要,但暫未有具體時間表。

第一手消息請下載on.cc東方互動iPhone/iPad/Android/Windows Phone Apps

設計圖片及對白