SUN搞作：打橫嚟講：呢個「國」，誰去「愛」呢？

當一個國家，有敵軍入侵，執政者鼓動民眾情緒，挑起保家衞國精神，呼籲百姓齊心「愛國」，那是有需要及理解的，但太平盛世，GDP高企，居於世界強國之巔時，口口聲聲叫人愛國愛國，係咪有點精神錯亂？定係外強中乾，國運勢危呀？

「愛國」的情愫，只屬於普羅大眾，無權無勢之蟻民，嚴格來說，「愛國」是百姓的專利品。當權執政者？沒有資格推銷「愛國」，就如財金官員不可以推銷某隻股票，此乃利益衝突，要懂避嫌。

「愛國」無準則的害人禍端，同埋，有時效性和階級性的！

清初，那群反清復明的義士，肯定是愛國的啦！若被捉到，更肯定會被朝廷定性為亂黨，殺頭啦！孫中山好彩革命成功，否則，又係個尋釁滋事分子，噢！佢一直都係個被追緝的通犯。國民黨主政時的南京政府，不斷截殺共匪賊類的毛澤東；文革時的劉少奇、彭德懷、鄧小平，哪個有被當權者稱讚為「愛國」的呢？

歷史上，哪個專制政權的掌政者，會認自己禍國的呢？只會誣衊別人「不愛國」，便於施刑加罪。

當一個國家，不停日日叫佢啲子民唔好捕食野味、唔好見死不救，又無止境地苦勸高官勿貪腐成狂、要為人民服務，但由一九七八年呼喊到依家，三十五年過去了，一群藍螞蟻，變成會飛的蝗蟲，奔翔五大洲，遭全球人類喊打時，誰敢「愛」呢個「國」呢？你話係咪？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府