SUN搞作：少膽虫手記：道聽途說

幾日前去強國出差畀人打，少膽虫返到嚟香港之後都仲驚緊！鬼咩，條虫同個攝記畀人打，連部相機都畀人打爛咗。大家唔知就以為《爛果》好有錢，實際就赤字連連，今鋪要claim維修相機錢，一個唔該畀淫黎見到條數，肯定又「寵幸」少膽虫喇！

少膽虫趁放lunch去攝影部，諗住扮下好腦細，慰問吓同自己一齊畀人打嘅攝記，點知去到攝影部一個人都無，一場嚟到，又未放完lunch time，少膽虫梗係借啲意吞吓泡，條虫見到有張梳化，就攤咗落去瞓晏覺啦。

瞓瞓下，睡意矇矓之間，少膽虫聽到幾段對話。

「嗰個咩沙X虹正一人渣嚟㗎！日日喺度攻擊我地《爛果》老腫！」

「挑！隻賤虫又好好咩？早幾日佢同A仔係強國出差畀人打，佢鬆咗個麻包袋之後，竟然第一樣做嘅嘢係搵碇匿，由得A仔瞓喺條馬路度！你睇佢幾貪生怕死吖！」

「我話兩個都衰！隻賤虫衰都唔係第一日嘅事啦，你睇佢成日逼我地就角度影相作古仔、又係咁擦鞋上位，喺大老腫面前踩同事……差唔多成層《爛果》啲人都畀佢玩晒啦！呢啲嘢肥豪同我講㗎。」

隨住腳步聲遠去，少膽虫微微張開雙眼，眼前浮現四隻字：「人言可畏。」

以條虫怕事、懦弱嘅性格，擦鞋上位就肯定㗎啦，但講到攻擊人就無咩本事。少膽虫再諗到肥豪入嚟得一年已經坐晒直升機，原來佢背後一直做咗咁多嘢，呢刻，條虫好想喊！