政壇：政商定格：施榮忻帶囡囡賣旗練膽

喺上周六遇到菁英會榮譽主席Jaime施榮忻同讀緊小學四年級嘅大女Victoria，父女檔現身銅鑼灣街頭，落力向途人賣旗。Victoria初時有啲膽怯，Jaime就從旁教授技巧，仲教佢無論途人買旗與否，都要保持禮貌，微笑講多謝。

有爸爸教路，Victoria即時信心大增，表現愈來愈淡定，最後仲成功賣咗兩版貼紙旗添。記者上前同Jaime打招呼，原來佢話大女已經係第二次賣旗，對上嗰次係小一。佢話一向都好鼓勵囡囡親身參與慈善活動，事關可以訓練到佢嘅責任心同膽量之餘，更主動關心社會事務。

Jaime笑言，賣旗期間遇到唔少內地旅客，幸好Victoria普通話不俗，唔少同胞都慷慨解囊。雖然Victoria最後都賣唔晒疊貼紙旗，亦受過途人拒絕買旗，但佢同囡囡講，結果並唔重要，盡咗力去做就得喇。