政壇：黃煜接掌浸大傳理學院

浸會大學傳理學院前院長趙心樹舊年初因為涉嫌「偷步」公布特首選舉民調惹公憤，之後專責小組極速完成民調風波調查，更引起外界非議。自趙心樹問責辭職後，院長一職懸空至今差不多一年，外界一直關注新院長人選。浸大尋日終於宣布，委任現時嘅傳理學院署理院長兼新聞系教授及研究院行政副院長黃煜，擔任傳理學院院長一職，由下月一日生效。

浸大校長陳新滋除讚黃煜係新聞學教育家，研究工作出色外，仲特別讚黃煜對傳理學院非常熟悉同有承擔。陳校長舊年中曾經講過，新院長一職共有超過十人申請，但佢強調新任院長唔單止要學術好，仲要人品好。唔通經過趙心樹一役，特別凸顯人品好重要？