政壇：CY怕示威者嘈 搬位發言

特首辦尋日公布咗一項行會採訪新安排，表面上話「方便傳媒採訪」，實際上係對傳媒走位嘅極限挑戰。

逢星期二開行會前，特首CY梁振英會先招呼特首辦門外嘅一班請願人士，然後轉個靚身，透過傳媒向全港七百萬市民放話，而各位專業嘅請願人士亦好識把握機會，趁佢講嘢時高舉口號做布景板。話說前排因為請願人士高叫口號，聲量蓋過CY，CY之後就話現場「太嘈」，冇答記者問題就轉身而去，據聞就係因為咁，所以就有新安排，CY喺門外接完請願信，先行入特首辦地下大堂放話，以便傳媒採訪。

但問題就嚟喇，須知道添馬艦對乜嘢人用乜嘢門口出入有嚴格規定，CY接信後就話可以用特首辦正門入大堂啫，但傳媒就兜圈要走後門先入到去，淨係計步程都慢幾秒，仲未計有電視台攝影師要勞師動眾搬晒啲器材入室內喎，所以呢項「方便傳媒採訪」嘅新安排絕對係對傳媒一項挑戰。