政壇：黃靜文唔做副局樂逍遙

早前一個周末，見到政制及內地事務局前副局長黃靜文，同幾位波友齊齊到滘西洲公眾高爾夫球場切磋球技。已有十多年波齡嘅佢打高球有姿勢又有實際，佢話十年前同幾個老友柴娃娃去學打Golf，點知初次接觸就深深迷上，最瘋狂時期，每星期會打兩、三次。佢笑言，高球啱晒佢呢啲冇乜運動細胞嘅人玩，最享受喺一片綠色草地上，邊打波邊同老友「吹水」，之後仲會一齊食飯，檢討彼此嘅不足之處。後來做咗副局長，就因公務繁忙而疏於練習，搞到成績一落千丈，所以佢趁住依家回復自由身，乘機重拾球桿，希望打番好啲波咁話。

早前獵頭公司曾經搵佢做平等機會委員會主席，接替林煥光，但佢最終因顧及市民期望而婉拒咗。但另一邊廂，據聞中華廠商聯合會行政總裁梁世華即將離任，商會正考慮搵佢過檔幫手。對此佢不置可否，仲話唔排除任何可能性，似有玄機喎！