政壇：阿毛動議搵嘢嚟嘈

新一屆立法會開鑼之後，開會時間愈嚟愈長，當中除泛民議員拉布外，最大問題就係個別議員口水多過茶，兼亂提動議，尋日立法會資訊科技及廣播事務委員會討論香港電台同數碼廣播電台等議題，就係其中一個例子。

其實公文袋嘅毛孟靜喺會前已去信委員會主席黃毓民，批評具內地背景嘅電視機構製作節目訪問本港主要官員，好明顯係硬推洗腦教育，擔心下一代會好快就會被染紅。另一封信就係要求委員會討論亞視多次違反《電視節目守則》一事，又話依家廣管局嘅罰款機制唔夠阻嚇力，仲要叫政府人員同亞視代表親臨立法會解釋喎。

議員大鬧嘥時間

當委員會之後討論港台未來路向時，議員先批評廣播處長鄧忍光上任以來是非不絕，除成日畀人話佢打壓編輯自由外，又鬧佢企圖將港台電視化，好似係港台「太上皇」咁獨攬大權。

毛孟靜跟手就提出一個連佢自己都話係「阿媽係女人，阿爸係男人」嘅無約束力動議，話港台近年發生咁多事，但鄧忍光竟話嗰啲港台員工嘅指控係毫無根據，要求政府確保港台編輯自主之餘，仲要承諾唔可以對港台作出任何政治干預。

唔少建制派議員都覺得毛孟靜嘅動議嘥大家時間，建仔嘅鍾樹根仲摷番毛孟靜寫畀主席嘅兩封信嚟講，反鬧佢先係粗暴干預新聞自由同編輯自主嗰個。樹根鬧爆毛孟靜提出動議根本就係假惺惺，講一套做一套，冇嘢搵嘢嚟嘈。樹根愈鬧愈起勁，之後仲話毛孟靜好似做咗亞視老闆，規定人做呢樣嗰樣之餘，仲話要吊銷人哋牌照咁巴閉。雖然樹根都鬧咗毛孟靜一段時間，但佢最後都係決定投棄權票，令委員會最後以六票贊成、四票棄權通過動議。