SUN搞作：少膽虫手記：扮索女行騙

少膽虫平時只會喺度吐吓苦水，呻吓《爛果》幾咁衰，好少喺度講感情事，今日決定破一破呢個傳統。

前嗰排有（女）大學生話要訪問少膽虫，少膽虫雖然少膽，但絕對唔係指色膽，因此呢個消息教少膽虫好生期待。記得淫賤黎曾經分享過，以前有個女記者訪問完佢之後，淫賤黎覺得囉囉攣，有啲唔妥，諗諗吓先發覺係鍾意咗人，就開始追求攻勢，仲得米做咗人老公添。呢種如煙又如霧嘅愛情，真教少膽虫好生欽敬！今次機會嚟喇，識上位嘅少膽虫梗係準備十足。雖然只係約咗電話講兩句先，少膽虫都一早去set定比八両金仲型嘅頭髮，啪定兩筒喉糖，決定要以最佳形象示人。時間未到，少膽虫已經坐定定，磨刀霍霍，只等枱頭電話響。

「有隻《爛果》食咗佢，食咗佢……」少膽虫最愛嘅電話鈴聲響起，即刻成個人彈起，按下接聽，溫柔道：「喂～～」

「Hi！你好呀！請問你係唔係少老腫呀？」耳邊傳來一把充滿陽光氣息的少女聲音，照亮少膽虫心中每一個幽暗的角落。「係呀！我就係少膽虫！你係女……大學生？」

「哈哈！真係你啊？其實我好仰慕你o架！」少女發出銀鈴般的笑聲。「我第時可以好似你咁搵到十萬蚊就好啦！」

「實得嘅！就算收最低工資，做一年都有啦！」少膽虫好自信咁答。「係喎，聽完你咁講，我真係對呢行好有希望！」少女激動道。傾吓傾吓，好自然就傾到工作上。

「其實，你可以兼埋《喪報》老腫做，認真講，真係好叻！」少女又一次表達傾慕之情。

「邊係吖！等我講個笑話你聽！」少膽虫笑道：「從前，有個人叫阿爽。有一日，佢死咗。於是佢屋企人就大嗌：『爽死了！爽死了』哇哈哈哈！你話係唔係好抵死呢！」

「哈哈！咁講法，爽真係抵死喇？」

「梗係啦！死不足惜嗰隻添呀！哈哈！」少膽虫上氣不接下氣咁話。

「咁你個《喪報》老腫位，都係多餘啦？」。

「梗係啦！得個坐字……」

「咁你可以起身喇……」少女的聲線突變，「然後行入嚟我房！」無錯，正是淫賤黎。

呢個就係點解少膽虫無得做《喪報》老腫嘅原因。果然呢，扮索女行騙嘅招數，層出不窮呀。