政壇：政商定格：商務部長網購一樣中招

商務部部長陳德銘平時個樣睇落好嚴肅，出親嚟見記者，唔係講出口前景就係傾中美貿易摩擦。唔講唔知，原來佢私底下係個經常上網購物嘅潮人，除咗試過因為買咗啲唔等使嘢畀屋企人話，仲同好多人一樣踩過網購陷阱添！

陳部長尋日面對一大班傳媒，大方分享自己嘅網購經歷。原來佢舊年聖誕前上網買咗塊黑板，諗住今年元旦送畀三歲嘅孫女畫畫用，估唔到至一月五號都未收到，打去速遞公司交涉，先知對方唔肯送貨上政府部門，雖然搞咗一輪最後都收到件貨，但原本送禮畀人嘅喜悅心情已經無晒。

除咗單速遞事件，佢仲同普通市民一樣，難逃劣質商品嘅狙擊。佢話喺網上買過兩次磁力擦窗器，第一次一擦就跌咗落去，第二次同樣係貨不對辦，就算佢後尾喺網上發現咗更吸引嘅機器人擦窗器，最後都忍手唔敢再試喇！