政壇：搞搞政：黃錦星崇尚無燉煮意

講到慳電能耐，環境局局長KS黃錦星認第二，相信冇人敢認第一，事關佢連飲食都要減碳。

KS尋日同記者聚會時話，平時食飯好少用「燉」嘅方式煮食物，因為火力猛又煮得耐唔夠慳喎。點知呢頭講完，佢一攞起餐牌望望，就發現其中一道菜係燉湯，連忙大喊「唔記得審閱」，身旁嘅新聞官打圓場，話三八婦女節就破例一次啦！聽到咁講KS惟有就範喇！

眨吓眼，KS上任已八個月，既要改善空氣，又要諗計減少垃圾廢物，仲要同兩間電力公司就電費拉鋸，工作密密麻麻，有時逼住將工作帶返屋企，但亦因此同女兒多咗見面。佢話未做官前係學者身份，難免要出席講座、晚會或同建築業界交流吓，但依家專心一意做好局長，反而「識得返屋企」。

佢又自爆話好多環團活動都係周末舉行，所以佢依家幾乎連周六、日都冇假放，更加唔好講放長假喇。但佢點都要喺農曆年初五放番一日假，皆因嗰日係二月十四號情人節，佢同老婆去咗大澳拍拖行山，浪唔浪漫就唔知，但總算補番數啦！