政壇：城大辦獸醫學院不求人

為爭取九龍塘前李惠利學校地皮，浸會大學上至校長陳新滋，下至數以百計大學生都陷入苦戰。同樣位於九龍塘豪宅區嘅城市大學咁啱亦申請開辦獸醫學院，既需要校舍，又需要農場飼養動物供學生實驗之用，但城大校董會主席胡曉明就好淡定話，城大靠自己資源搞得掂，唔使向政府伸大手板喎！

城大兩年前向大學教育資助委員會申請開辦獸醫學院遭否決，校方準備充足後捲土重來，今年已再向教資會提出申請，教資會亦轉口風設立小組研究方案。胡曉明透露，城大已同一位地主租咗元朗新田好大塊農地，佢唔係好清楚租金幾多同面積幾大，總之唔會好似鄰居浸大咁樣，搶地搶到全城關注啦！講番浸大爭奪地皮風波，有知情人士爆料話，早前政府打算喺新蒲崗另撥一塊地皮，用作支持浸大起中醫教學醫院之用，但浸大突然態度劇變，搞到官民爭地咁肉酸，唔知政府會唔會反口呢？