政壇：高佬賢聽民意日接300 call

做得民意代表梗係要聽民意，所以立法會議員每日都會接到好多市民或業界嘅求助同投訴，而漁農界議員「高佬賢」何俊賢就經常被call爆機，最高紀錄係一日收到三百多個來電，換言之平均每個鐘收到逾十三個電話，認真唔講得笑。

點解一日收咁多電話呢？有熟悉業界中人話，漁農界中人出名快人快語，諗到有乜就會第一時間打畀高佬賢，但佢有時要開會未必接到電話，起初業界對佢未有即時接電話都有啲唔慣，但後來慢慢熟悉佢嘅處事模式後，佢就再冇試過一日收到咁多個call喇！

同樣因角色轉換令接電話方式要變嘅，仲有新任古物諮詢委員會主席林筱魯。佢話以前對於冇來電顯示或唔識嘅電話，未必會個個都聽。但做咗古諮會主席後，基本上邊個打電話來都會接。唔知第時再處理具爭議嘅保育項目時，保育團體會否動員打畀林筱魯爭取支持呢？