政壇：梁永祥出身基層知疾苦

新上任僱員再培訓局主席嘅William梁永祥來頭不小，曾擔任恒生銀行執董，依家又係新鴻基金融嘅行政總裁，而且公職一籮籮。但為咗同廣大打工仔拉近距離，佢尋日同傳媒茶敍時就自貶身價，話自己唔係「貴族」，只係基層出身，仲要半攻讀先讀完大學添！

William透露，爸爸生前係油麻地小輪（現稱香港小輪）嘅船長，所以佢細個時經常有機會遊船河，就係坐爸爸駕駛嘅小輪，由深水埗去中環，再由中環坐返去深水埗，成為當時夏天最佳消暑活動。

正因為出身基層，佢話讀中學時已經要搵兼職供自己讀書，到讀完大學後仲都要負責供養細佬妹入大學，所以佢好明白基層對一份工嘅需求同期望，自己都認為培訓局嘅工作好有意義，希望可以幫到基層人士向上流動。