政壇：政商名人獻計 拯救特色老舖

雖然內地個人遊旅客帶動本港零售業同地產市道，但亦產生唔少中港矛盾，香港舖租有升冇跌，唔少政商界名人都慨嘆具本土特色嘅老店買少見少，紛紛向政府獻計，拯救本土特色產業。

港區全國人大代表羅范椒芬尋日接受內地媒體訪問時坦言，因為迎合內地人奢侈消費需求，搞到成條街都係鐘錶店、珠寶店，以前賣粥嘅小食店、具本土特色嘅商店、零食店都冇晒喇！

恐本土小食失傳

羅太舉例話，好似喺銅鑼灣最受歡迎嘅旺區，業主點會將間舖以一萬元租畀麵包店，而唔收十萬元租畀鐘錶店呢？因為商人追求最大利益。佢話本港有需要提供更多購物點，迎合內地客需要，同時要保留本港嘅小區特色，滿足港人需要。佢又話自己冇興趣睇鐘錶同珠寶，亦買唔起奢侈品，有一隻錶就已經夠嘞，就連行街都可以減少。

菁英會榮譽主席施榮忻日前出席一個活動時都話，好希望政府諗計調控舖租，否則未來一至兩年內會出現「有舖冇人租」嘅現象。佢自言愛「掃街」，不時會到街邊篤魚蛋、牛雜、咖喱魷魚，所以好驚呢啲富有香港特色嘅小食失傳。

佢認為唔係所有旅客來港都只買名牌、化妝品，其實都想見識吓地道嘅飲食同文化。佢期盼政府唔好扼殺街邊檔，適度發牌畀小販，留生存空間畀佢哋，例如協助年輕人發展小生意，建立本土特色產業，好似台灣特色景點之一嘅夜市咁，豐富旅遊業內容，提升軟實力。

資深時裝設計師鄧達智亦感慨話，租金貴唔止趕絕小商戶，亦扼殺埋本地創意工業嘅生存空間。佢仲自爆本月底會喺中環開一間自家品牌服裝店，吓？咁佢咪好有信心賺到錢交貴租？佢解畫話好彩遇到一位良心業主，以低於市價租金一半嘅友情價出租咋！