政壇：搞搞政：侯志強北上作樂攞正牌

北上鬆一鬆係城中唔少人嘅假日選擇之一，不過，好多人都好低調，費事畀人戴上有色眼鏡睇。上水鄉事委員會主席侯志強就冇有怕，尋日自爆鍾意北上唱Ｋ，而且次次都唱通宵，仲係唔過夜都唔返歸嗰隻，佢坦承當中不乏有美女相伴o架！太太竟然唔介意﹖就係，侯志強話太太只係驚佢一個人北上會被人打劫，最好搵多啲人陪伴北上喎。

侯志強講到興起，一副中年輕狂咁嘅樣。佢話，北上唱Ｋ輕鬆吓係最大樂趣，因為佢唔係「同志」，有女仔陪唱都好正常，而且唔靚嘅女仔都冇資格陪佢喎，但係咪陪唱咁簡單，咁就得佢自己先至知喇。侯志強仲自稱係「全香港最早返屋企嘅男人」，因為佢唱到第二朝七點就返屋企，仲夠時間叫老婆起身添。佢講到好似攞正牌去玩咁，都唔知真定假。

其實侯志強做主席都唔係一味顧住玩，好似近期佢都籌咗五百萬元，修葺同翻新河上鄉一間洪聖古廟同觀音廟，本月二十四號仲會大開七百圍盆菜益鄉里，到時有大戲睇，又有搶花炮等慶祝活動，總之咩都有得玩。