政壇：簡勤食腦舊手機變黃金

香港人好鍾意追新款手機，因而催生唔少舊手機問題，正喺北京出席兩會嘅全國人大、中國移動通信集團四川分公司嘅董事長簡勤就倡議環保，提出加強國內回收處理棄置手機，佢仲話，目前全球每年都有約四億部棄置手機，中國更加佔當中約一億部，如果全數回收呢一億部棄置手機，計一計可以提取到一千五百公斤黃金、三萬公斤白銀、一百萬公斤銅。嘩，原來舊手機係「寶」喎！

舊手機零件含有好多有毒物質，例如鉛、鎘、汞等等，處理不當就會嚴重污染生態環境，但如提煉貴金屬，就毒都變寶。所以簡勤建議，應該盡快制訂棄置手機回收處理嘅管理方法，由手機生產廠商、零售商、電訊商牽頭，建立回收處理棄置手機的產業鏈、回收價格機制等。佢仲認為，應該補貼同優惠棄置手機回收企業。