政壇：鐵頭仁洩街坊私隱

議員辦事處係唔少街坊求助嘅地方，不過身為立法會超級議員嘅民主黨何俊仁（鐵頭仁），佢嘅辦事處處理街坊投訴個案嘅做法真係嚇親人。有讀者向本報投訴，話見到鐵頭仁位於屯門啟豐商場嘅辦事處張貼咗一張「個案記錄表」，求助街坊嘅全名、手提電話號碼同求助個案內容都被途人睇晒。經常追究政府部門及公僕洩露市民私隱嘅議員都帶頭洩密？問番鐵頭仁，佢矇查查唔知件事，辦事處職員就解釋係用環保紙之過！睇嚟街坊搵議員幫手前真係要諗清楚兼帶眼識人。

網傳白鴿內鬥疑雲

向我哋投訴嘅讀者話，尋日路過啟豐商場鐵頭仁嘅辦事處時，見到佢哋嘅玻璃櫥窗貼咗張「個案記錄表」，仲要係啲個人資料完全冇遮冇掩，透過職員嘅筆記仲可以估到係投訴人喺大興體育館巴士站被隻冇戴口罩嘅狗咬傷。呢位讀者批評鐵頭仁辦事處外洩市民個人資料做法太疏忽，仲話︰「如果畀投訴人見到，（投訴人）被人騷擾咁點算？」

鐵頭仁話佢唔知呢件事，而佢嘅辦事處職員就解釋因為同事環保，所以用記錄紙背面寫低工作情況貼喺櫥窗。職員又話，佢哋以後會小心處理個人資料喎。白鴿黨近日亦再度惹是非，日前有網民就喺網上討論區以「民主黨內幕」為題，上載咗十宗該黨嘅內部人事鬥爭傳聞，但部分內容存疑，如指范國威等新民主同盟成員係因為不滿劉慧卿偏幫黨內嘅原前綫成員而退黨，白鴿黨、公民黨同教協若即若離關係等。有網民留言話事實證明佢哋無鬧錯白鴿黨喎。

泛民自作孽，喺立法會嘅表現更不濟，由於佢哋唔團結、爭唔到各大事務委員會正副主席，建制派操控晒啲開會時間，以致呢兩個禮拜人大政協兩會，立會就好巧妙安排三月份首兩個星期三休會，期間只有零星事務委員會舉行，身兼人大政協議員僅十三人，但要其餘五十七位議員唔開會，真係不顧民生。