政壇：政商定格：蔡伯勵撐愛兒慈善畫展

堪輿大師蔡伯勵有十一個子女，排行第二嘅蔡爾雅就擅長絹畫創作，日前佢嘅畫展舉行時，蔡大師都有露面，我哋請佢贈兩句香港流年運程啦，蔡大師話，雖然今年流年有阻滯，但整體冇乜大礙。

早前大師嘅女、蔡家當家人蔡興華曾批算梁振英（CY）十年大運已過，蔡大師尋日就打圓場話CY生肖屬馬，今年有吉星照耀，又話運程嘅嘢仲有好多環境因素影響，即使市民對CY認識不足，但相信以CY嘅能力同個人意志，市民嘅睇法會慢慢改變。蔡興華就話，佢只係以CY個人嘅角度批測，不過爸爸就以生肖觀點批算，屬馬嘅CY今年運程唔錯，有太陽星高照，萬事皆可雨過天青，逢凶化吉。講番蔡爾雅，佢早年曾經喺比利時定居，依家就住喺順德推動文化產業，近日就搞咗個畫展，並將畫展賣畫嘅收入捐贈畀東華三院。