政壇：搞搞政：黑英猛掹掣 變慳電達人

唔少城中人追求低碳生活，環境局局長黃錦星（KS）係慳電人辦，建築物節能專家出身嘅KS好重視節約用電，每人每日只用一點五度電，連出晒名慳到只有兩套西裝兩對鞋嘅前天文台台長林超英（黑英）都公開話輸得心服口服，黑英仲向佢學習，由每人每日用兩度電，改進到一點五度電，唔通佢換晒全屋太陽能發電？

黑英去年喺電台節目大爆KS嘅慳電計劃後，佢仲自認不如，忍唔住問：「佢（KS）係點做到嘅呢？」經過幾個月嘅研究，黑英尋日喺電台節目宣布，佢已經成功練成屋企每人每日只用一點五度電嘅慳電絕技！點慳番嚟嘅呢？黑英話好簡單，一字記之曰：「掹」，有插蘇唔用要掹，連備用叉電插蘇都要掹，總之見電掣就掹，掹掹吓就慳到度電。另外，沖個凍水涼，咁又慳番啲電，最後買埋個細啲嘅水煲，每次煲水煲少啲咁就達標喇。

其實，慳電可以從兩方面着手，一係節省用電，一係使用環保能源，唔少環保人士都話，香港太陽咁猛，好適合做太陽能發電，偏偏成本太高，黑英佢哋與其競賽用少啲電，不如諗吓減低太陽能發電嘅成本、推廣多啲人用環保能源更佳。